|
Gedanken aus der Bütt'
Bleibe jelassen, mein Herz,
schon jrößere Frechheit ertrugst Du.
(Odysseus)
Pfarrer Winfried
Anslinger zur Fastnacht 2004
Genoowend.
Liebe Gemoinde, ei dess iss awwer schää, daß ich
eich do all ootreff.
Ich bin nämlich de Wolfgong. Vunn Ludwigshafe.
Ich kumm grad vum Boohnhof. Unn de Herr Wagner hot misch mit de Tax
hergfahre.
Hot gfrocht, wu isch hiwill. Unn do hawwisch gsaht, isch will zu de
Brotdschdandisch Kersch.
Ei zu wellere, hott er gfrocht.
Ja, do hawwisch erscht mol uffm Schlauch gschdanne. Zu wellere Kersch?
Ei zu wellem Parre wollese donn? Hott er gsacht.
Wollen se zu dem klääne Schwarze mitm Schnauzer oder zu demm
wu immer kreischt uff de Kanzel, oder wolle se zu der Parresch in Sanddorf?
Nää, zu dere eher nett, Die schafft im Moment nett. Des hääßt
die schafft im Moment fer unser Rente.
Ei, sach ich, des war son frommer Name, so was kerschlisches.
Ach so, sie meenen Beede. Do wohn isch ah.
Unn wer sinn Sie?
Ei, sach isch, ich bin de neie Parre vunn Beede. Ich hab misch do beworwe.
Ach so, sagt de Herr Wagner, de nei Parre. Eio, de alte Parre iss jetzt
fort. Der alte Parre, dess war nämlisch so än Griener. So äner,
der hott Körner gfresse unn alles mit Sonnenenergie
betriewe unn so Zeich. Soin roter Porsche iss mit Sonnenenergie gfahre
und ah de Strom unn die Heizung. Alles. Do hots nadierlich net immer
Sonnenenergie gewwe, gell? Die Sunn schoint jo nit immer. Deswege hott
der jo achn Bart getrage, der Parre. Mions beim Rasiere, geht die Sunn
grad uff, unn im Winter isses als noch dunkel. Unn weil mer eieweil noch
Winter hänn, do wärs jetzt bassiert,
dass der Parre uffm Weg in die Kersch, ääfach oigefrore
wär. Aus Energiemangel. Mit soim Auto.Unn do hett er, de Herr Wagner,
de Ufftrach kriet, er wär jo Bestatter
im Neweberuf, do hett er de Ufftrach kriet, den Parre grad so zu losse
wie er war. Also im oigefrorene Zustand. Des hätt aah die Landeskerch
so verfügt. Bis zum jüngschte Dach sollt des so bleiwe. Er
hätt extra ä Kühlhaus
baue müsse, beim Bensel newer de Worschtküch, hett er grad
oogebaut. Do kennt mer den alte Parre jetzt besichtiche. In einem Schrein
aus heimischen Hölzern, giftfrei und naturbelassen. Aus nachwachsenden
Rohstoffen. Hätt er extra gemacht.
Ouh, sach ich do, bis zum jüngschte Gericht, dess kann awwer daure.
Saaht der Herr Wagner, des kennt er net beurteile, wär net soi Fachgebiet,
awwer die Kerch hätt ä Pilotprojekt gemacht. Es deede insgesamt
10 broteschdandische Parre oigefrore werre fer bis zum jüngschte
Gericht. Unn zwar wege dem Broteschdationsjubiläum. Des Johr wird
475 Johr Broteschdation gefeiert in Speyer. Unn sie wisste
halt net, ob des nochemol 475 Johr long halte deet mit dem Broteschdandische.
Die Brodeschdande werr jo immer wennischer, gell? Unn die zehne sollten
uff jeden Fall emol die Stellung halte. Dass wenigschtens
10e üwwrichbleiwe. Bis es soweit iss mitm Jüngschde Gericht.
Unn warum hänn se do 10 Parre ausgsucht? Die hätten doch ah
Lehrer nemme kenne, oder Lektore, Presbyter, s´gibt doch allerhand
respektable Leit.
Jo, sacht de Herr Wagner. In Beede hätten se aah gonz dichtiche
gehatt. Awwer des wär noch dem Motto vum Luther gange:"Des ewiche
Lewe gibt’s ganz ohne Verdinschte".
No ja, sach ich do, irgend ään Verdinscht werren die evangelische
Parre schunn als hawwe.
Ja schunn, sacht er. Awwer so wies halt inn de Biwel heeßt: "Sie
haben ihren Lohn schon dahinn." Unn - die Kersch hott jo aah kä Geld
meh. Do iss des garnet schlecht, wamma ä paar Verdinschde spare
kann. Außerdem de Fraue vunn denne war des vielleicht aah net unrecht.
Weil so än alter Theolog, son ausgepreddischder, des iss jo aah
kä roines Vergnüche määh. Unn donn Somsdach netdehäm,
Sunndachs mied. De Seeche krien immer die annere Leit.
Bloß, hab ich donn gsaht, dass se beim oifriere net ah an
die Ulla Schmidt gedenkt hawwe unn an denn Stolpe, des iss eigentlich
schaad.
Aja, die hänn sich schunn genau üwwerlescht, wenn se do wegbeame
wolle unn wenn net. Die Ulla Schmidt, die iss vielleicht ähfach
zu zäh zum Oifriere. Unn beim Stolpe, do kanns jo soi, dass der
owwe beim Petrus, glei ä Mautstation
uffmacht.
No ja, sag ich, wonn die Mautstation do owwe so funktioniert wie bei
uns do hunne, kann er im Himmel 100 Mautstatione uffmache ... Also jedenfalls,
ihr krien jetzt widder ´n neier Parre. Awwer ich muß mich
erscht ämol vorstelle.
Wie gsaaht, ich bin de Wolfgang Pappenhoimer von Ludwigshafe. Ich war
bis jetzt uffm Hemshof. De Hemshof, dess iss mitte in Ludwigshafe drin,
zwische de Prinzregentestroß unn
de Kanalstroß. Wu frier als die Anniliner häämgonge sinn.
Uffm Hemshof war ähni Wertschaft newer de annere. Des iss heit leider
vorbei. Dodefor sinn mer jetzert gonz mitdikulduralischdisch. Also: Vunn
iwweraal her sinn bei uns die Leit. Unn Relischione hänn
se aah all verschiedene.
Also im Grund ä rischdischie Herausforderung fer än Parre.
Moi Fraa zum Beispiel, die iss Moslem, moi Kinner, die sinn unglaiwisch,
unn moi Schwester, die hott ä ganz neiie Relischion uffgemacht.
Stellt eisch vor, die steht als uffm Rathausplatz in Ludwigshafe un preddischt.
Sagt: "Kehrt um, denn das Himmelreich ist nahe". Ich sach
als zuere: Menschnskind Claudia, des iss doch nix neies. Isch kenn jedenfalls ähner,
der wees des schunn long! Bloß den hänn se ons Kreiz geschlaah
defor, also bass uff,
was de sagscht.
Also, jedenfalls mir uffm Hemshof in Ludwigshafe, mir sinn gonz ökonomisch
multikulturalischdisch.
Unn ich denkemol, ehr in Beeden - ehr kennt bei eisch doch ah ämol
en frische Wind brauche, odder?
Ich hab misch grad mit eirer Kerschedienerin unnerhalde. Die saaht awwer,
mer brauchen kenn frischer Wind in Beede, bei uns ziehts in de Kersch
immer schunn wie Hechtsupp. No ja, sach ich do. Fer alles gibt’s ä Lösung.
Bei uns war des aah net onnerscht. Unn do hawwisch a glei was debei fer
eich.
Do, gucken emol. Schää long unn warm. Soll ich eisch vunn denne
mol 200 bestelle? Hä? Bloß 100 ? Was bloß 30? Achgott,
bei eisch isses jo wie in Ludwigshafe. Do gehen se aah net in die Kersch.
Awwer ich hab noch ebbes. Habt ehr ´n Kerschechor? Mer hänn
aah äner. Unn wissener was? Bei uns fehlen die Männer. Zwee
im Baß, äner im Tenor. Wißt ehr wie sich des oohert?
Ich machs eisch liewer net vor. Mir hawwen dodefor awwer ä Lösung.
Do, guckt. Ä CD mitm
Thomaschor vunn Leipzich. Gonz beriehmt. Die singe als im Fernseh. Den
leschen mer uff, wonns so weit iss. Un unser Chor, die brauchen donn
bloß noch die Gosche uff un zu mache.
Des heert sich immer gloer ooh und kenner merkt ebbes. Ehr brauche kenn
Chorprob määh, eier Dirigent, der konn so long in die Wertschaft
gehe. Ehr brauche bloß noch onn Karfreidach unn Woinachde kumme.
Aller, Iss des wass?
Iwwerhaupt, Karfreidach unn Ooschdre: Warum gehen bei uns heitzudach
so wennisch in die Kersch? Es iss gonz ääfach – Weil
do nix los iss. Ich sach immer: Was nix koscht iss nix wert. Bei uns
uffm Hemshof hämmer am 1.1. ä Kerscheoitrittsgebühr
oigfiert. Wie bei de Doktere. Iss jo allgemeoin ieblich jetzt. Muscht
nadierlich ah ebbes biete defor.
Ich hab letscht Johr n Kurs in Handufflesche gemacht. Die Fraue, die
sinn donn tatsächlich all kumme unn wollten vunn mir die Hand uffgelescht
hawwe. Bis moi Ursel gesaaht hott: Konnscht grad ausziehe. Ich waart
seit 10 Johr druff, dass du mehr
mol widder die Hand ufflegscht. Naja, deswege hab ich mich jetzt aah
bei eisch beworbe.
Awwer bei uns uffm Hemshof wars immer schäh. Mer hänn als Erlebnisgottesdienschte
gemacht. Wanderung durch die Wüste, immer um de Altar rum. De Frauebund
hott Sand gschtreit unn die Zimmerpalme uffgschtellt. Odder "die
Wanderung der Kinder Israel durch das rote Meer".
Wonn als noch ä bissl Rotwoi iwwrich war vumm Abendmahl. Nur war
des unsre Fraue doch zu viel Sauerei, weil se am End alles widder hänn
uffbutze misse. Besonnerscht beleibt waren immer die Dschungelgottesdienschde.
Wu s´als
Werm zu fesse gibt und Käwwere. Alle biblische Plage konnte mer
do durchnemme. Bis ses nimmer aushalte gekennt hawwe unn ähner gekrische
hott:
Ich bin än Chrischt, holt mich do raus.
Iwwrischens, ich hab gsehe, ehr habt do massisch Parkplätz und Gadrobb
in Beede. Unn die Kloos loßt ehr die Leit gradis benütze.
Des ded ich abstelle: 1 € fer im Stehe pinkle iss doch net zu viel
! 2 € fer im Sitze... Parkgebühre müssen ehr doch aah
sunscht bezahle, odder? Ehr seid selwer schuld, wann eisch ´s Geld
fehlt. Hääßt ´s net in de Biwel: "und er
nahm an sich, was gegeben ward?"
Unn donn hawwisch noch ebbes geheert. Des hott sich bis zu uns in die
Palz rumgesproche: Dass nämlich die Saarländer sich gern
däden scheide losse. Do konn ich eisch nur äähn Rot gewwe: Ä Eh,
wu nix koscht, iss aah nix wert. Mir sache als: "Bis dass der
Tod euch scheidet". Awwer känner nemmts ernscht. Wann mer awwer
jetzt so ä Art Kaution verlange deede, sache mer
mol so 10 000 €, uff die Haltbarkeit der Ehe, do wär des velleicht
annerscht.
Ich meen: Kaution iss doch ebbes gonz Normales. Wannde ä großes
Auto lehnscht, so ä Laschder vielleicht,
muscht jo aah was hinnerlesche. Fer wonn de den Karre zu Schrott fahrscht.
Fer ä Fraa odder ä Monn brauchscht nix hinnerlesche.
Brauchscht bloß Gütertrennung zu vereinbare unn noch 10 Johr
gebscht se zurück. Runnergewertschaft velleicht. Unn konnscht der
widder ä Junges leischde. Aus Thailand oder vunn Ghana. Des iss
net rischdisch. Wann awwer do so ä Kaution wär, unn des kummt
uff die Anwaltskoschde druff, deet sich’s moncher iwwerlege. Unn
die Kersch hätt
ab un zu ah emol was devunn. Letscht Johr hammer 3 Trauunge gehatt uffm
Hemshof, warn 30 000.- €. Ähner devunn iss schunn geschied,
des hott glei mol ä neiie Kerschturmuhr gewwe. Aioo, mer muss praktisch
denke. Ich wääs net wie des mit eirer Kerschturmuhr iss, die
alte Uhre, die gehen jo als nie rischdisch, monchmol leide se midde in
de Nacht. Do hott mer mehr Huddl wie sunschtwas.
Eieweil hawwisch noch was. Des iss jo an de Schule jetzt verbote. Die
wollen, daß de Moslems ehr Fraue Hüt trache solle. Finn ich
richtisch. Ich konn jo aah net in die Kersch kumme wie ich will. Awwer
bei uns bleiwe die Kopptücher uff. Weil inn de Kersch hänn
die Fraue vor 200 Johr schunn aah als Kopptücher getrache. Do kenne
jetzt die Moslemfraue zu uns kumme, ihr 10 € bezahle unn - wupp
- s´Kopptuch uff.
Gell ich bin net bleed? Ich heeß net Eichel. Mir mache als bei
uns äähn Kopftuchtag, ähn Rauchertag, ähn
Dach zum Abnemme, ähn Dach fer die Geschiedene zur Partnerneuwahl.
Mir kenne do kenn Grenze.
Bloß letschdie Woch, do war äner bei mir, der wollt soin Hund
bei mir daafe losse. Sach ich, des geht net, guter Monn, de Hund iss ä Tier.
Sacht der, wonn se wolle, kennen se mich aah daafe , awwer fer moin Hund
will ich mol ä ordentlichie Beerdischung. Do gugg ich mer den Monn ä bissl
genauer an unn saach: Achgott, jo do daaf ich liewer ehrn Hund. Wie der
Dekan des heert, hotter gesacht: Des geht awwer net, ä Hund iss ä Tier.
Sach ich, ei Herr Dekan, der Herr hott 5 000.- € gespend. Sacht
der Dekan: Was? 5 000 €? Wann werdn der Hund konfermiert?
Habt ihr eigentlich aah so ebbes wie än Frauebund? Sinn des die
Fraue, die do rumlaafe unn bediene unn bei de Fassnacht als ufftrete?
Ei des iss awwer charmant. Was ich do gsehe habb, also Respekt, Respekt.
Scheene Figürcher.
Nett so derr wie die bei de Meenzer Fassenacht. Fer die Fraue hab ich
nämlich aah ebbes debei. Unn zwar wonn als emol Besuch kummt. Was
machen nern do? Hocke eisch grad so do hie? Nee des iss falsch. Mer muss
de Gascht aktiv begrüße. Dass der sacht,
ei, des war awwer ämol schää. Irgenwann kummt bestimmt
mol de Landrat oder de Boiermääschder.
Oder velleicht de Kerschepräsident, unn wanns bloß de Herr
Dekan iss.
Guggenemol! So Stiwwelscher. Fer jedie vunn eisch. Do kenner als ä bissl
danse unn die Bää schlenkere. Unn des do iss fer die Cheer
Leader erfunne worre. Die Lauterer benutzen so was uffm Betze. Also,
die nemmener in die Händ und los geht’s. Herr Kapellmäschder,
kennen se uns mol de Ton gewwe?
Also: Gott zum Gruß Herr Landrat, wolln se glei än Doornkaat?
Gott zum Gruß Herr Bürgermeischder, trinken se än Jägermeischder
Gott zum Gruß oh Herr Dekan, kumm se glei ans Büffet ran.
Gott zum Gruß Herr Präsident, der do der iss selbscht gebrennt.
- Herr Minischder, Grüß sie Gott, vum Lisbeth gibts ä Worschtebrot
- Herr Rippel hörn se uff zu suche, probiern se unsern Applkuche.
Lalalalalalala....
- Herr Schäfers grüß Sie Gott der Herr, heut bedient
sie die Frau Knerr
- Tach, Herr Kuhn kommn sie herein, heute gibt es Moselwein.
Die Katholen Protestanten und die ganzen Anverwandten
Feiern ökonomisch hier, trinken Wein und Schnaps und Bier
Lalalala
So, aller widdersehn, ich muss fort, noch uff Zweebrigge. Do hawwisch
misch aah beworrwe. Aller donn.....
zu
weiteren Gedanken
nach
oben
|
|